Tilgjengelegheits­erklæring

Sist oppdatert 13. oktober 2026

Søya Gard vil at alle skal kunne bruke soeya.no, uansett funksjonsevne, nettlesar eller eining. Sida er laga med mål om å følgje retningslinjene for tilgjengeleg innhald, WCAG 2.1 på nivå AA. Krava til universell utforming av nettsider står i likestillings- og diskrimineringslova og forskrifta om universell utforming av IKT.

Vi testa sida 13. oktober 2026 med det automatiske testverktøyet Lighthouse og kontrollerte at alle lenker og knappar kan nåast med tastatur og har namn.

Dette har vi gjort

• Sida er laga for å kunne brukast med tastatur, og det er ei lenke heilt øvst for å hoppe rett til innhaldet. Bileta i galleria kan opnast i stor visning med Enter.
• I bookingkalenderen les skjermlesarar opp heile datoen og om dagen er ledig eller oppteken, og alle felt i bookingskjemaet har namn.
• Overskrifter, menyar og landemerke er merkte, slik at skjermlesarar kan navigere i sida.
• Bileta på dei faste sidene har tekstalternativ som skildrar dei.
• Teksten har god kontrast mot bakgrunnen (testa med Lighthouse).
• Sida tilpassar seg mobil, nettbrett og PC.
• Menyen viser kva side du er på, og om ei lenke går til ein del lenger nede på same side.

Dette veit vi ikkje fungerer godt nok

• Kartet på forsida kjem frå OpenStreetMap og kan vere vanskeleg å bruke med tastatur og skjermlesar. Adressa står òg som tekst: Søyland 37, 4334 Ålgård.
• Videoen under «Aktivitetar» har ikkje teksting eller synstolking.
• Bilete i nyheiter og arrangement har tittelen på saka som tekstalternativ, ikkje ei skildring av kva biletet viser.
• Nyheiter og arrangement finst berre på norsk (nynorsk). Dei andre sidene finst òg på engelsk – bruk språkknappen øvst på sida.

Meld frå om problem

Får du ikkje brukt noko på sida, eller treng du informasjonen i ei anna form? Ta kontakt på soeya@online.no eller ring (+47) 95 81 23 25, så ser vi på det.

Er du ikkje nøgd med svaret, kan du melde frå til Tilsynet for universell utforming av IKT.